Gallery
Deskribapena
Deskribapena
1988 eta 1991 bitartean indarkeriazko zenbait ekintza izan ziren ETAren eta Herri Batasunaren inguruaren kontra, inongo talde terroristak erreibindikatu gabeak. Gainera, urte haietan GALek utzia zion, itxura, bere ekintzetan jarduteari. Izan ere, talde horren azken atentatu erreibindikatu eta egiaztatua 1987an izan zen, Juan Carlos García Goenaren hilketa. 1988 eta 1991 bitarteko indarkeriazko ekintza sortak honelakoak hartzen zituen nagusiki: HBren egoitzei edo militanteen etxeei eraso egitea, zinegotzi edo jarraitzaile abertzaleen autoak erre edo leherraraztea, heriotza-mehatxuak, bonba-gutunak, erasoak –horietako asko GAL siglak gorputzeko gune jakin batzuetan labanaz grabatzea izaten ziren–, “espres” bahiketak eta galdeketak, etab.
Atentatu anonimo horietako batek, HBko Errenteriako militante Ildefonso Salazar Uriarteri bidalitako bonba-paketeak, Jose Antonio Cardosa 22 urteko postari gaztea hil zuen 1989ko irailaren 20an, asteazkenarekin. Bertsio bat baino gehiago izan zen krimenari buruz. Inork ez zuen atentatua erreibindikatu. ETAk estatu aparatuei egotzi zien ekintza.
1996an Jose Antonioren familiak harriduraz jaso zuen hilketari buruzko informazio berri bat. Luis Roldánek Baltasar Garzón epailearen aurrean deklaratu zuen GALen sumarioetako batean, eta ziurtatu zuen José Barrionuevo Barne ministro izan zen garaian, baita José Luis Corcueraren ondorengo garaian ere, gerra zikineko ekintzak izan zirela. Barne Ministerioari leporatu zion etakideei eta taldearen inguruneari bonba-gutunen bidalketaren atzean egotea. Hilketa horren benetako egiletza sekula ez da ezagutu, eta 2000ko urrian artxibatu egin zuten kasua.
Prentsa
