Diego Valencia

Deskribapena

2023ko urtarrilaren 25ean, 18:30 inguruan, Yassin Kanza terroristak Algeciraseko San Isidro parrokiara jo zuen eta bertako eliztarrekin eztabaidan aritu zen, erlijio katolikoa utz zezaten exijitu ondoren. Eztabaidaren ostean, alde egin eta ordubeteren buruan itzuli zen, aihotz batekin, eta Antonio Rodríguez apaiza zauritu zuen. Antonio egoera larrian eraman zuten Algeciraseko Puerta de Europa ospitalera.

Jarraian, Yassin Kanzak La Palma parrokiarantz jo zuen “heriotza kristauei” eta “Alá handia da” oihukatzen zuen bitartean. La Palma parrokian sartu eta zenbait ondasun eta kandela lurrera bota zituen. Diego Valencia sakristaua eliztarrak defendatzen eta Yassin Kanza parrokiatik kanporatzen saiatu zen, baina Kanzak aihotzaz erail zuen elizaren kanpoaldean, plaza Alta izeneko enparantzan. Terroristak bere bideari ekin zion hurbileko Europa kaperarantz, baina itxita aurkitu zuen. Virgen de las Lágrimas plazan atxilotu zuen poliziak.

La Palma parrokiako apaiza, Juan José Marina, aldameneko parrokian zegoen eta adierazpen hauek egin zituen Cadena SER irratian atentatuaren egunean: “mezaren erdian pertsona batek oihu egin du La Palman atentatu bat gertatua zela. Korrika etorri naiz honantz eta hau aurkitu dut”.

“Meza ondoren izan da. Zuzenean joan da haren kontra. Ez dugu mehatxurik jaso, behin izan ezik. Diegok pentsatu zuen aldarera gauzak botatzera igotzen diren pertsona horietako bat zela, baina suposatzen dut, momenturen batean, aihotz nahiko handi bat zeramala ikusi zuela eta haren kontra joan zen”, azaldu zuen apaizak Cadena SER irratian. Hildakoari buruz esan zuen: “Diego zen nire oinak eta nire eskuak. Niretzat, Diego gizon fidela izan da eta, seguruenik, heriotza hori niri zuzendua zen, baina berak aurkitu du”.

Diego Valencia sakristau laiko eta ezkondua zen, bi seme-alabaren aita.