ETAGallery
Deskribapena
Deskribapena
ETAren historiako laugarren bahiketa tragedian amaitu zen. Angel Berazadi Urbe industrialaria, Sigma enpresako zuzendari kudeatzailea zena, 1976ko martxoaren 18ko arratsaldean bahitu zuten enpresatik irtetean eta, askatzearen truke, talde terroristak berrehun milioi pezetako erreskatea eskatu zuen. Berazadi hogei egunez atxiki zuten, Itziarko Ipiola baserrian, une hartan Eduardo Moreno Bergaretxe Pertur buru zuen ETA politiko-militarreko komando bereziek.
Familiak, EAJren laguntzarekin, industrialaria askatzearen truke ordaintzeko ahaleginak egin bazituen ere –Angel Berazadi oso hurbil zegoen EAJ alderditik–, ez zuten lortu ETAk eskatutako kopurua, eta 1976ko apirilaren 8an, hogei eguneko gatibualdiaren ondoren, Berazadiren gorpua Elgoibar-Azkoitia errepideko areka batean agertu zen, ahoz gora, begiak soldatzaile betaurreko batzuez estalita eta garondoan tiroa zuela. Horixe izan zen ETAren bahiketa batek hilketaren amaiera tristea zuen lehen aldia.
Angel Berazadik ederki hitz egiten zuen euskaraz, eta euskal kulturaren bultzatzaile handitzat zuten, ikastolen sorreran lagundu baitzuen Elgoibar, Zarautz edo Donostian, garai batean Zarauzko futbol taldearen presidente izateaz gain. Hamar milioi pezeta ematea eskatzen zion ETAren mehatxuzko gutun bat jaso eta urtebetera bahitu eta hil zuten.
Prentsa
