Gallery
Deskribapena
Deskripzioa
Manuel Eleuterio Liáñez Benítez CNT sindikatu anarkistaren militantea izan zen gaztetan. Dena den, 1962an, hil zuten urtean, aspalditik utzia zuen jada jarduera sindikal eta politiko oro. Une horretan 71 urte zeuzkan, eta ezkongabea zen; bakarrik bizi zen, eta ez zuen seniderik. Pentsio batean bizi zen, eta bertako ugazabak esan zuenez, “likoreen arloko salmenta-agente ziharduela esaten zuen”, “oso atsegin eta edukatua” zen eta “bizimodu moderatua zeraman, inoiz ez nion ezohiko ezer antzeman”. Sekula ez zion “politikaz hitz egiten entzun, kontrakoa baizik, eta oso katolikoa zelako adierazpenak egiten zituen”.
1962ko ekainaren 13an Liáñez 09:15ean irten zen pentsiotik. 11:00etan leherketa bortitza izan zen trenbideko erdiko nasan, Instituto Nacional de Previsión deituaren ordezkaritzaren parean. Manuel Eleuterio Liáñez hantxe zegoen, eta esku bien anputazio traumatikoa eta erredurak eta zauri sakonak izan zituen gorputz enborrean eta buruan; horien guztien ondorioz hil zen. Gainera, beste bi pertsonak ere zauri arinak izan zituzten atentatuan.
Atentatuaren lehen hipotesia izan zen terrorista bati bere bonba lehertu zitzaiola, baina laster baztertu zuten ideia hori. Kasuaren instrukzio-epaileak adierazi zuenez, biktimak “inolako zalantzarik gabe, ikusi egin zuen lehergailua diru-zorro batean jarrita, zer zen jakin gabe; eskale txiroa zenez, hartu egin zuen, eta diru-zorroan zer zegoen ikusteko manipulatu nahi izan zuenean, heriotza eragin zion leherketa gertatu zen”. Alabaina, azalpen hori baliozkotzat eman bazuten ere, oker zegoen diru-zorroari dagokionez, ez baitzen lapurtua, Liáñezena berarena baizik.
Poliziak sekula ez zituen atentatuaren egileak atxilotu. Ez dakigu nor izan ziren, bai ordea zer talde terrorista izan zen: Defensa Interior (DI). FAI, CNT eta Juventudes Libertarias-ek 1962an sortua, taldeak indarkeria erabili zuen Francisco Francoren diktadura amaiarazten saiatzeko. Helburua lortzetik urrun, baina, 1963an exekutatu egin zituzten bi taldekide, eta 1965ean taldea desegin egin zen. DI anarkistaren “arrakasta” bakarra izan zen oker batez hiltzea anarkosindikalista izandako bat: Manuel Eleuterio Liáñez Benítez.