Muturreko eskuinaGallery
Deskribapena
Deskribapena
1993ko apirilaren 11ko goizaldean, Montanejosen (Castellón), eskuin muturreko talde batek bihotzean labankada bat emanda hil zuen Guillem Agulló i Salvador valentziar gaztea, 18 urtekoa eta Burjassoteko (Valentzia) bizilaguna. Igerilaria zen, eta 1992ko Bartzelonako Olinpiar Jokoetan parte hartzeko aurrehautatuan egon zen. Adin txikia izan arren, 1990eko hamarkadako Valentziako ekintzaile antirrazista eta antifaxista ezaguna zen, SHARP taldean eta Mauletsen militatzen baitzuen.
1993ko Aste Santuan lagunekin kanpatzen ari zen, eta gauez, herriko plazan zegoela, eskuin muturreko talde bat haren bila joan zen eta jipoitzen hasi zitzaion, aldi berean lagunei hura laguntzea eragotziz. Erasotzaileek kalezulo batean estutu zuten, bihotzean labankada eman zioten, eta alde egin zuten Cara al Sol kantatuz eta agur faxista eginez.
Urte luzez, haren familiak —gurasoek eta ahizpek— eskuin muturraren jazarpena, mehatxuak, pintadak eta telefono-deiak jasan zituzten. Halaber, “Guillem, izorratu hadi” zioten grafitiak agertu ziren, baita futbol-zelaietan eta haren etxetik gertu ere. Las Provincias egunkariak kasuaren inguruan egin zuen jarraipenak, hiltzaileak errugabetu nahi zituzten albiste faltsuekin, biktimaren birbiktimizazioa ekarri zuen.
Justiziak ez zuen gorrotoagatiko astungarria aintzat hartu, eta “gazteen arteko borroka” baten ondoriotzat jo zuen. Krimenaren egile aitortu Pedro Cuevasek lau urte eman zituen kartzelan. 2007an, Chivako (Valentzia) udal hauteskundeetan Alianza Nacional ultraeskuindar alderdiko zerrendetan aurkeztu zen. Gainerako inplikatuak absolbituak izan ziren. Urte batzuk geroago, Agullóren hiltzailea Panzer Operazioa deiturikoan inputatu zuten, Frente Anti Sistema (FAS) izeneko zelula terroristarekin lotuta; talde horrek arma-arsenal bat eta granada-jaurtigailu bat zituen. Kide guztiak absolbituak izan ziren, telefono-entzuketak froga gisa baliogabetu ondoren.
Guillem Agullóren kasuak hunkitu egin zuen Valentziako gizartea, eta “esnatze” moduko bat ekarri zuen gazte askorentzat, egiaztatu baitzuten faxistek demokrazian ere hiltzen jarraitzen zutela. Gaur egun, Agulló Valentziako Erkidegoan eskuin muturreko terrorismoaren aurkako borrokaren sinbolotzat hartzen da.
Prentsa
