ETAGallery
Deskribapena
Deskribapena
1968ko abuztuaren 2an ETAk Meliton Manzanas González hil zuen Irunen (Gipuzkoa); Francisco Franco diktadorearen polizia sekretua zen, eta oposizioa jazartzera dedikatzen zen Brigada de Investigación Social deitu hartako inspektore burua. Frankismoaren kontrako oposizioko kide askok salatua zuten Meliton Manzanas, atxilotuen kontra tratu txarrak eta torturak erabiltzeagatik.
Horixe izan zen talde terroristaren aurrez pentsatutako lehen hilketa. Txabi Etxebarrieta terroristak José Antonio Pardines Arcay hil eta ia bi hilabetera gertatu zen. Bi hilabete lehenagoko egun horretan, Etxebarrieta eta Iñaki Sarasketa Donostiara zihoazen, hain justu Meliton Manzanasen hilketa prestatzera, baina Pardinesek, errepideko kontrol batean, terroristak gelditu egin zituen; une horretan Etxebarrietak Pardines hil zuen, ETAren lehen biktima bihurtuz horrela. Meliton Manzanas da talde terroristaren bigarren biktima, eta lehenengo euskal herritarra.
Pardines hil eta ordu batzuetara Guardia Zibilarekin izandako liskar batean Etxebarrieta hil ondoren, ETAren Biltzar Ttipiak erabaki zuen Manzanas eta Bizkaian eginkizun berberak zituen polizia hiltzeko planekin segitzea; azken atentatu hori ez zen gauzatu.
ETAk “Sagarra operazioa” deitu zion Meliton Manzanas inspektorearen hilketari. 1968ko abuztuaren 2ko arratsaldeko hiru eta erdiak inguru zirela, Meliton Manzanas etxera iritsi berri, Xabier Izko terroristak bizkarretik tiro egin eta hantxe bertan hil zuen, haren emaztea eta alaba aurrean zirela; etxeko soto batean egon zitzaion zain. Gertaeraren tokian poliziak zazpi bala-zorro eta 7,65 milimetroko kalibreko lau jaurtigai aurkitu zituen. Atean inpaktu bat zegoen, eta bi paretan. Forentsearen txostenak erakutsi zuen gorputzak bost bala-zauri zituela, horietako hiru buruan. Heriotza unean bertan gertatu zen.
Prentsa
